Jo çdo sekret është problem, por disa ndryshime në sjellje mund të tregojnë se kufiri i shëndetshëm është kaluar Në çdo lidhje ekziston një kufi mes asaj që është “e imja” dhe asaj që ndahet me partnerin. Privatësia është e shëndetshme dhe e nevojshme, sepse secili ka të drejtë për hapësirën, mendimet dhe kohën e vet. Megjithatë, ndonjëherë pas fjalës “privatësi” mund të fshihet diçka tjetër: shmangia, mbyllja në vetvete apo edhe fshehja e qëllimshme e informacioneve. Dallimi nuk është gjithmonë i dukshëm, por ndjesia që keni shpesh është sinjali i parë se diçka nuk është në ekuilibër. Privatësia si kufi i shëndetshëm Privatësia do të thotë që një person ka hapësirën e vet, pa pasur nevojë të shpjegojë vazhdimisht çdo hollësi të ditës. Kjo mund të përfshijë kohën vetëm, bisedat me miqtë, mendimet personale apo hobet. Në një marrëdhënie të shëndetshme, privatësia nuk krijon parehati. Përkundrazi, ajo bashkëjeton me ndjenjën e sigurisë dhe të besimit. Kur privatësia shndërrohet në fshehje Problemi lind kur sjellja fillon të ndryshojë dhe informacionet shmangen sistematikisht. Nëse partneri bëhet i paqartë, ndryshon versionet e tregimit, shmang përgjigjet konkrete ose reagon në mënyrë mbrojtëse ndaj pyetjeve të zakonshme, nuk bëhet më fjalë vetëm për nevojë për privatësi. Sjellja e fshehtë zakonisht ka një model. Nuk është vetëm një rast i veçuar, por diçka që përsëritet. Bashkë me të shpesh shfaqet edhe ndjesia se “diçka nuk shkon”, edhe kur nuk mund ta shpjegoni menjëherë pse, transmeton Telegrafi. Shenjat që mund të tregojnë se partneri po fsheh diçka Asnjë nga këto shenja, e marrë veçmas, nuk do të thotë domosdoshmërisht se ekziston një problem. Por nëse disa prej tyre përsëriten, ia vlen t’u kushtoni vëmendje:

• papritur fillon ta ruajë telefonin apo pajisjet personale shumë më tepër se më parë;
• bëhet i paqartë për vendin ku ka qenë apo me kë ka kaluar kohë;
• shmang bisedat për tema të caktuara;
• reagon me nervozizëm ose në mënyrë mbrojtëse ndaj pyetjeve të zakonshme;
• keni përshtypjen se po merrni informacione të filtruara ose jo të plota.

Dallimi kryesor: ndjenja e sigurisë Dallimi më i madh mes privatësisë dhe fshehjes qëndron te mënyra se si ndiheni në marrëdhënie. Privatësia nuk e cenon besimin: edhe kur secili ka hapësirën e vet, marrëdhënia vazhdon të ndihet e qëndrueshme dhe e hapur. Kur ka fshehje, zakonisht rriten pasiguria, dyshimet dhe ndjenja se një pjesë e marrëdhënies mbahet jashtë jush. Çfarë të bëni nëse dyshoni? Hapi i parë nuk duhet të jetë akuza, por biseda. Shprehni qartë dhe qetë se si ndiheni, pa ngritur përfundime paraprake apo pa sulmuar partnerin. Më mirë të përqendroheni te përjetimi juaj: “Kam përshtypjen se…” ose “Kam vënë re se…”, sesa të filloni me akuza. E rëndësishme është edhe të vëzhgoni reagimin. Një partner i gatshëm për komunikim zakonisht do të përpiqet ta sqarojë situatën. Nëse shmangia vazhdon dhe ndjenja e pasigurisë thellohet, kjo mund të jetë shenjë se marrëdhënia kërkon një bisedë më serioze dhe një rishikim të mënyrës se si po funksionon besimi mes jush.