Autoritetet greke janë vënë në alarm pas një telefonate anonime për vendosjen e një boBme në tragetin Blue Star 2, i cili ishte nisur nga porti i Pireut me destinacion ishujt e Cikladeve dhe Dodekanezit. Sipas informacioneve, telefonata është bërë në Autoritetin Portual të Pireut, ndërsa anija ka devijuar dhe ka mbërritur urgjentisht në portin e Lavrios për t’iu nënshtruar kontrolleve nga ekspertët e çminimit të Rojës Bregdetare dhe një qen i specializuar për zbulimin e lëndëve shpërthyese. Në portin e Lavrios janë nisur gjithashtu ekipe të zjarrfikësve dhe të shërbimit të urgjencës EKAB, ndërsa operacioni i kontrollit vijon. Në bord ndodhen 952 pasagjerë dhe 98 anëtarë të ekuipazhit, gjithsej 1.050 persona. Trageti kryen itinerarin Pire – Siros – Patmos – Leros – Kalymnos – Kos – Rodos. Deri tani nuk ka të dhëna për origjinën e kërcënimit, ndërsa autoritetet greke po hetojnë të gjitha pistat e mundshme.