Sot, me iniciativë të Kryeministrit dhe liderit të OBRM-PDUKM-së, Hristijan Mickoski, në ambientet e Klubit të Deputetëve do të mbahet takimi i liderëve me kryetarët e partive parlamentare që kanë grupe parlamentare në Kuvend.

Sipas paralajmërimeve, në këtë takim do të diskutohen ligjet reformuese në fushën e gjyqësorit, zgjedhja e Avokatit të Popullit, ndryshimet në Kodin Zgjedhor, si dhe mundësia e shfuqizimit të qeverisë teknike. Në rend dite pritet të përfshihen edhe tema të tjera që do të propozohen nga pjesëmarrësit.

Nga partitë opozitare, pjesëmarrjen e kanë konfirmuar lideri i “Të Majtës”, Dimitar Apasiev, si dhe kryetari i BDI-së, Ali Ahmeti. Ndërkohë, kryetari i LSDM-së, Venko Filipçe, ka refuzuar ftesën për të marrë pjesë në takimin e liderëve.

Filipçe, në një konferencë për shtyp më 8 janar, deklaroi se nuk pranon bisedime për shfuqizimin e qeverisë teknike, duke akuzuar Kryeministrin Mickoski se kërkon, siç tha ai, “alibi për shpalljen e zgjedhjeve të parakohshme”.

Sipas Filipçes, qeveria teknike duhet të mbetet si garanci për zgjedhje të drejta dhe si mekanizëm për parandalimin e keqpërdorimit të institucioneve. Sa i përket ligjeve reformuese, ai theksoi se debati duhet të zhvillohet në Kuvend, ku LSDM-ja, sipas tij, do të mbështesë të gjitha zgjidhjet cilësore. Ai shtoi se partia do të marrë pjesë në zgjedhjet parlamentare nëse ato shpallen.

Në takimin e sotëm të liderëve, të thirrur nga Mickoski, pjesëmarrjen e kanë konfirmuar edhe kryetari i BDI-së, Ali Ahmeti, Bilall Kasami nga VLEN, si dhe Maksim Dimitrievski nga ZNAM.